30 наурыз күні Коста-Рикада алғаш рет ұлттық радиоэфирде қазақстандық орындаушы Димаш Құдайбергеннің Screaming композициясы қойылды. Трансляция Extra Radio 92.3 FM эфирінде жүзеге асып, жергілікті жанкүйерлер қауымдастығы үшін маңызды шараға айналды.

Аталған шараның жүзеге асуына қазақстандық әртістің Dimash Kudaibergen Costa Rica FC фан-клубының қызметі елеулі ықпал етті. Аталған ұйым мүшелері ұзақ уақыт бойы өз елдерінде сүйікті орындаушының шығармашылығына деген қызығушылықты тұрақты түрде қолдап келеді.

Фан-клуб өкілдерінің айтуынша, бұл эфир олар ұзақ күткен екен. Сонымен қатар, олар Extra Radio 92.3 FM ұжымына қолдау көрсеткені және Димаштың шығармашылығын кең аудиторияға ұсынуға мүмкіндік бергені үшін алғыс білдірді.

Жанкүйерлердің пікірінше, бұл оқиға тек Коста-Рикадағы тыңдармандар үшін ғана емес, сонымен қатар Димаш Құдайбергеннің халықаралық аудиториясының одан әрі кеңеюіне ықпал етеді. Радиоэфир жаңа тыңдармандарға әншінің қайталанбас үні мен шығармашылық диапазонын тереңірек тануға мүмкіндік береді.