Испаниядан келген Димаш Құдайбергеннің жанкүйерлері Қостанай облысында қыркүйекте болған қатты өрт туралы хабардар болып, зардап шеккен отбасылардың балаларына көмек көрсетуді ұйғарды. Осылайша, Әулиекөл ауданындағы өнер мектебіне фан-клуб тарапынан музыкалық аспаптар сыйға тартылды.
Димаштың жанкүйерлері «Қайырымдылық» қоғамдық қоры арқылы Әулиекөл ауданындағы өнер мектебінде балаларды музыкалық сауаттылыққа баулу үшін музыкалық аспаптар сатып алуға 1000 еуро берді.
«Отбасылары өрттен зардап шеккен балаларға көмек көрсете алғанымызға өте қуаныштымыз. Димаштың арқасында екі елдің бірігуі керемет. Біз оның жанкүйері болғанымызды мақтан тұтамыз және бейбітшілік пен балалардың бақыты үшін қоян-қолтық араласамыз», – деп бөлісті Мария Кармен.
Бүгін, 29 қарашада музыкалық аспаптардың салтанатты тұсаукесері өтті. Шара барысында өнер мектебінің оқушылары қор құрылтайшыларын құшақ жая қарсы алып, сонымен қатар концерттік бағдарламамен өнер көрсетті.
«Қайырымдылық» қоғамдық қорының төрағасы Батырбек Ахметов бүлдіршіндерді құттықтап, шығармашылық табыс тіледі.
«Қаражат түскеннен кейін біз Әулиекөл ауданындағы балаларға не сатып алған дұрыс деп талқыладық. Пайдалы болсын деп, музыка мен шығармашылық тақырыбын қозғағым келді. Бізде талантты балалар көп, сондықтан музыкалық аспаптар ең жақсы сыйлық болады деп шештік. Осылайша, Испанияның музыкалық жан дүниесінің символы ретінде гитара, ал Қазақстанның музыкалық жанының символы ретінде домбыра сатып алу ойымызда болды», – деп бөлісті «Қайырымдылық» қорының құрылтайшысы Гүлмира Қапенова.