Freedom Inside форумы аясында Димаш Құдайберген Tatler Kazakhstan бас редакторы Анара Кукиеваға сұхбат берді.

Әңгіме басында алғашқы сұраққа жауап бере отырып, Димаш сұхбат беруді аса ұната бермейтінін атап өтті, себебі оның пікірінше, әртістер ең алдымен кәсіби мансабын қалыптастыруы тиіс, әрі ер азаматтарға көпсөзділік жараспайды.

«Сіз музыкамен не үшін айналысасыз – табыс, атақ үшін бе, әлде ән жазып, орындамастан тұра алмайтыныңыз үшін бе?» деген сұраққа Димаш музыка оның өмірінің ажырамас бөлігі екенін айтты. Оның пайымдауынша, музыка қазіргі заманда халықтар арасын жалғап тұратын көпір әрі дипломатиялық «құрал» қызметін атқарады. Әнші музыкамен коммерциялық мақсатта емес, қазақ халқының кең пейілін таныту, сондай-ақ жас таланттарды әлемге таныстыру үшін айналысатынын ерекше атап өтті.

Димаштан Қазақстан мен Қытайдағы тыңдармандардың айырмашылығы туралы сұрап еді, ол тек екі елмен шектелмеуді ұсынды. Әлемнің түрлі стадиондарында өнер көрсеткенін және шамамен 150 фан-клубы бар екенін айта келе, әр халықтың өзіндік ерекше энергиясы мен атмосферасы болатынын жеткізді. Сонымен қатар, ол қазақстандық көрермен алдында ерекше толқыныспен өнер көрсететінін айтып, басты мақсат – барша адамзатты ізгілік пен бейбітшілікке шақыру екенін атап өтті.

«Сіздің шығармашылық жолыңызда қандай да бір табу, тыйымдар бар ма? Мысалы, жас әртістер контентті ілгерілету үшін TikTok-та жүздеген бейнеролик түсіруі керек пе?» деген сауалға жауап ретінде Димаш жаһандану дәуірінде нақты шектеулер туралы айту қиын екенін айтты. Цифрландыру жағдайында бәрі жылдам өзгеретінін, әлеуметтік желілердің алгоритмдері қалай жұмыс істейтінін нақты білмейтінін жеткізді. Дегенмен, егер өнер жүректен шықса, бейнероликтердің саны маңызды емес екенін және халық жүрегіне жол осылай табылса, оны теріске шығаруға болмайтынын атап өтті.

Сұхбаттың маңызды тақырыптарының бірі – Димаштың жаңа шоуы болды. Анара Кукиева жобаның табысы алдын ала болжанды ма, әлде команда үшін тосын жаңалық болды ма деген сұрақ қойды.

Шоу продюсерінің айтуынша, соңғы мәліметтер бойынша жоба интернетте шамамен 2 миллиард қаралым жинаған. Бұл жетістік көрермендердің қолдауының нәтижесі екені айтылды. Жобаның негізгі мақсаты – жас орындаушыларға жол ашу, дәл осындай мүмкіндік Димаштың өзіне де 9 жыл бұрын Singer жобасында берілген болатын.

Сонымен қатар, Димаш бұған дейін Арменияда берген сұхбатында өнер адамдары ғана емес, қоғамның басқа да салаларындағы тұлғалар туралы көбірек жазу қажеттігін айтқанын еске салды. Мысалы, робототехника бойынша жарыстарда жеңіске жеткен жастар туралы материалдар әзірлеу маңызды екенін атап өтті.

Жасанды интеллектіні қолдану туралы сұраққа ол әзірге мұндай тәсілді тәжірибеде пайдаланбағанын, бірақ ЖИ-ді белгілі бір тың элементтер жасау үшін қолдануға болатынын айтты. Сонымен бірге, жас музыканттарға алдымен академиялық білім алып, содан кейін ғана ЖИ мүмкіндіктеріне жүгінуге кеңес берді.

Бос уақыттағы іс-әрекеті туралы айта келе, әнші мотоцикл айдау оның хоббиі екенін бөлісті. Ол бұл туралы бұрын көп айта бермегенімен, жақында әлеуметтік желідегі парақшасында бейнеролик жариялағанын айтты. Бос уақытында Димаш достарымен араласып, жоспарлары мен армандарын бөліседі. Оның күнделікті тәртібі – «үй – студия, студия – үй».

«Сонда ешқандай кештерге қатыспайсыз ба?» деген нақтылаушы сұраққа 29 жасында «Халық әртісі» атағын алған Димаш жастық шақта еңбек етіп, қоғамға қандай пайда келтіре алатынын ойлау маңызды екенін айтты. Оның пікірінше, негізгі мақсаттарды 40 жасқа дейін жүзеге асырып үлгеру қажет екен.

Сұхбат соңында музыка теориясындағы аффектілер мәселесіне қатысты күрделі сұрақ қойылғанда, Димаш музыка адамның бойында тудыратын сегіз сезімнің бірін бөліп көрсетуден бас тартты:
«Бұл – тылсым құбылыс. Оны нақты сөзбен сипаттап, мәнін төмендеткім келмейді. Көп нүкте қалдырайық…»

Сұхбат аяқталғаннан кейін де көрермендер Димашты бірден жібермеді. Әнші сүйікті фильмі – қорқынышты жанр екенін, өзі жазған әндердің көпшілігі жеке өмірімен байланысты екенін атап өтті.

Алдағы жоспарлары қатарында Макаода өтетін орындауы мен Хаузер мен Пласидо Домингомен бірге Будапешт қаласында өтетін концерт бар екенін жеткізді.

Димашқа жиі қойылатын сұрақтардың бірі – жеке өмірі туралы. Әнші бұл сұрақтың Қазақстанға келген сәттен бастап жиі қойылатынын әзілмен айтып өтті. Оның пікірінше, әр адамның отбасын құру уақыты әртүрлі, өйткені бұл – өмірлік серігіңмен бірге қартаюды, бақытты өмір сүруді көздейтін маңызды шешім. Сонымен қатар, ол әлеуметтік желілерде әйелдерге қатысты орын алатын жағымсыз әрекеттерге алаңдаушылық білдіріп, ер азаматтар әйелдерді құрметтеп, қорғауы тиіс екенін атап өтті.

«Үш кесе шай ішу» философиялық тәсілі туралы сұраққа Димаш ойланбастан, өзін шабыттандыратын адам ретінде әжесін атап өтті:
«Анаммен шай ішкен сайын, ол кісімен бірге отыра бергім келеді. Кеше де сөйлестік, бүгін де сөйлестік. Ай соңына дейін көрісе алмаймыз, себебі жұмыс бабымен сапарда боламын. Онымен жиірек жүздесуді армандаймын, бірақ бізде көрермен алдындағы жауапкершілік бар. Дегенмен, жүрегімізде отбасыға деген сағыныш әрдайым сақталады…»

GALLERY