ҚАЗ 
RUS 
ENG 
22 ақпанда Димаштың Жапониядағы фан-клубы Қазақстан елшілігінің өкілдерімен кездесу өткізді. Димаштың Күншығыс елімен бұрыннан шығармашылық қарым-қатынасы бар. Тиісінше, жапондық фан-клуб қазақстандық әншіні ұзақ жылдар бойы бірауыздан қолдап келеді.
Шараға Қазақстанның Жапониядағы Елшілігінен құрметті қонақтар Әнуарбек Қарашев пен Айдос Дәркенов, сондай-ақ Қазақстанның Токиодағы Елшілігін құруға зор үлес қосқан жапондық Акао Сатоши қатысты.
Димаш 2019 жылы Токиода өткен ABU TV SONG FESTIVAL фестиваліне «S.O.S D’un Terrien En Détresse» әнімен қатысқан болатын. Келесі жылы бұл туынды қазақтың халық әні «Самалтау» әнімен бірге «Tokyo Jazz» фестивалінде орындалды.
2021 жылы Tokyo Jazz және ABU TV SONG фестивалінде Димаш жапон тілінде «Ikanaide» композициясымен шықты. Оның бұл туындысы көрермендердің, кәсіби музыканттар мен лириктердің көптеген қызу пікірлерін тудырды. Осы ретте жапондық фан-клубының Dears-ы танымал жапондық лирик, «Ikanaide» мәтінінің авторы Горо Мацуидің сұхбатын ұсынды.
2020 жылы Димаштың Dimash Japan Fan Club жанкүйерлері Флавьен Компаньонмен және Уолтер Афанасьевпен тікелей эфирде «Love’s Not Over Yet» әні туралы сұхбаттасты.
«Димаш – ғажайып жаратылыс. Ол жәй адамның періште-музыкалық туындысы! Оның таланты, вокалдық қабілеті, дауысы арқылы музыкаға деген сүйіспеншілігі – мен бұрын-соңды мұндайды көрген емеспін. Жаңа музыка жазу керек болса, біз оны жазамыз. Бірақ бәрі де өз уақытында болғаны дұрыс», – деп жауап берді композитор 2020 жылы жапон фан-клубының жанкүйерлеріне.
Енді, міне, уақыт келді – 7 наурызда барлық музыкалық платформаларда жаңа ән жарық көреді. Ал, Димаштың YouTube арнасында «Love’s Not Over Yet» бейнебаянының тұсауы кесіледі.
Алдыңғы кездесуге оралсақ, бұл Димаш Құдайбергеннің шығармашылығын талқылау ғана емес, нағыз мәдени алмасу болды. Қатысушылар Жапония мен Қазақстан арасындағы ұқсастықтарды талқылап, екі елдің мәдениеті мен тілі туралы білетін дүниелерін ортаға салды. Кештің атмосферасы ерекше болды.
Жапон фан-клубының «Қазақстан және Димаш» тақырыбында дайындаған бейнеролигін бірлесіп көру әсерлі сәт болды. Қазақстан Елшілігінің өкілдері видеодан кейін басқаша көңіл-күйге бөленді.
«Димаштың арқасында, оның әндері арқылы біз Жапония мен Қазақстанды біріктіретін байланыс пен күшті рухани жақындықты сезіндік», – деп бөлісті жапон фан-клубынан Dears.
