Түркістан облысында Димаш Құдайберген бас продюсерлік атқарған «Voice Beyond Horizon» халықаралық музыкалық шоудың түсірілімі басталды. Жобаға Қытай, Қазақстан, Қырғызстан, Италия, Малайзия және Сербия елдерінен өнерпаздар қатысуда.

Музыкалық жобаға қатысушылар Түркістан қаласына пойызбен келді. Түсірілім жұмыстары аясында олар «Әзірет-Сұлтан» кешені, Отырар елді мекені, «Қаравансарай» туристік кешені, этноауыл және Сайрам-Өгем ұлттық саябағы.сынды бірқатар маңызды туристік және мәдени орындарды аралайды:

Байқауға қатысушылардың кәсіби деңгейін арнайы шақырылған халықаралық сарапшылар бағалайды.

Түркістан облысындағы түсірілім кезеңі аяқталған соң, музыкалық шоуға қатысушылар шығармашылық сапарын еліміздің басқа аймақтарында жалғастырады. Халықаралық жоба Маңғыстау, Алматы және Ақмола облыстарын, сондай-ақ Алматы мен Астана қалаларын қамтиды. Шоудың финалы Қазақстанның астанасында жоспарланған.

Айта кетейік, Димаш Құдайберген жобаны Mango TV эфирлік және цифрлық платформасы арқылы күнделікті аудиториясы 210 миллионнан астам көрерменді құрайтын Hunan Broadcasting System компаниясымен бірлесіп жүзеге асыруда. Соның арқасында дүние жүзіндегі миллиондаған көрермен Қазақстанның туристік әлеуетін байқай алады.

Жобаға Қазақстан Республикасы Туризм және спорт министрлігі, Қазақстан Республикасы Мәдениет және ақпарат министрлігі, Kazakh Tourism ұлттық компаниясы, сондай-ақ облыс әкімдіктері ұйымдастырушылық қолдау көрсетті.