10 қыркүйекте Қазақстанда Димаш Құдайберген бас продюсер рөліндегі ауқымды музыкалық реалити-шоудың түсірілімі басталады. Жоба Hunan Broadcasting System компаниясымен бірлесіп жүзеге асырылуда.

Димаш үшін бұл символикалық қайта оралу болмақ, себебі он жылға жуық уақыт бұрын оның халықаралық деңгейде танылуы Hunan TV арнасындағы Singer шоуына қатысуынан басталған еді. Бүгінде ол жобаға халықаралық жобаның бастамашысы және продюсері ретінде жаңа рөлде қатысуда.

«Бұл жоба – Қазақстан мен Қытай арасындағы мәдени ынтымақтастықтың жаңа парағы болады. Мен үшін еліміздің байлығын – оның музыкасын, табиғатын және қонақжайлығын әлемге таныту маңызды дүние. Біз әлемнің түкпір-түкпірінен жиналған өнерпаздарды бір арнаға жинап, тағы бір мәрте музыкада шекара жоқ екенін дәлелдейміз», – деді Димаш Құдайберген.

Музыка және Қазақстан бойынша саяхат

Жобаға қатысушылар – Қазақстан, Қытай, Қырғызстан, Италия, Малайзия және Сербия өнерпаздары еліміздің көркем аймақтары арқылы шығармашылық теміржол саяхатына аттанады.
Түсірілім Астана, Алматы қалаларында, сондай-ақ Алматы, Ақмола, Түркістан және Маңғыстау облыстарында өтеді. Реалити-шоудың соңғы кезеңі елордамыз – Астанада өтеді. Негізгі нүктелердің қатарында Шарын шатқалы, Бозжыра трактісі, Көбейтұз көлі және Сайрам-Өгем ұлттық саябағы бар.

Жобаны эфир мен Mango TV цифрлық платформасы арқылы күн сайын 210 миллионнан астам көрерменді қамтитын Hunan TV арнасында көрсету жоспарланған. Біздің елде бұл жоба Qazaqstan телеарнасы арқылы көрсетіледі.

Жоба Қытай азаматтарының Қазақстанға туристік қызығушылығының артуы аясында, әсіресе елдер арасында визасыз режим енгізілгеннен кейін қолға алынуда. Қазақстанның негізгі орналасу орны ретінде таңдалуы оның саяхатшылар үшін тартымдылығын атап көрсетеді және әлемдік ірі туристік нарықта ұлттық бағыттарды ілгерілету үшін жаңа перспективалар ашады. Ұйымдастырушылық қолдауды Қазақстан Республикасының Туризм және спорт, Мәдениет және ақпарат министрліктері, Kazakh Tourism және әкімдіктер жүзеге асырады.