11 қараша күні, Димаш Құдайбергеннің жеке концерті қарсаңында, Ұлыбритания астанасында әлемнің түкпір-түкпірінен келген тыңдармандары жиналып, қазақ өнерпазының Лондонға көптен күткен оралуын атап өтті.

Dimash UK Dears фан-клубы ұйымдастырған pre-party The Royal Lancaster Hotel қонақүйінде өтті. Кеш қонақтарын кіреберісте қазақ мәдениетіне арналған көрме қарсы алса, зал ішінде шотландиялық музыкант Гордон Рэберннің өнерін тамашалады.

Қонақжайлық пен мәдени алмасу дәстүріне сай кеште Ұлыбритания мен Қазақстан өкілдері өнер көрсетті.

Англия атынан Лондондағы Корольдік музыка академиясының студенті, арфашы Элис Мизелли өнер көрсетті.
Уэльстен келген Gwalia Mens Welsh Male Choir ерлер хоры уэльс және ағылшын тілдерінде ән шырқады.
Ирландияның Music from Riverdance тобы ұлттық би өнерін паш етсе, Datchet Morris Dancers ұжымы да би нөмірлерімен көрерменді тәнті етті.

Қазақстаннан Кенжер мен Арлан Әбжановтар қобыз және фортепианода ойнап, ал әнші әрі гитаршы Ерболат Хұсайын өз Отанын қалың көрерменге таныстырды.

Кеш бағдарламасында Ұлыбритания мен Қазақстан мәдениетіне арналған көрме, қызықты лотерея, тайцзиден Ұлыбритания чемпионы Эмма Лидің шеберлік көрсетілімі, Чилиден келген Андреа мен қазақстандық Қымбаттың домбырамен орындаған әуендері шырқалды.Қазақстан мен Англияның атынан қатысқан кішкентай Мисс Каусар қонақтарға шағын қазақ тілі сабағын өткізіп, биші Гүлшара Жұбаева қазақтың халық биін орындады.

Шараға Димаштың шығармашылығын қолдауға келген белгілі қазақстандық режиссер Асхат Маемиров та қатысты. Ол 13 қараша күні Лондонда «The Arts Stage» театрының «Қара шапан» қойылымын ұсынбақ. Толықтай DimashNews сайтынан оқи аласыздар.

Кештің ерекше әсерлі сәттерінің бірі — Димаштың ата-анасы Қанат және Светлана Айтбаевтардың, сондай-ақ әртістің шығармашылық команда мүшелерінің қатысуы болды.

Қанат Құдайбергенұлы Dears қауымына өнерге деген шексіз сүйіспеншіліктері үшін алғысын білдіріп, әрбір кездесуден шабыт алатыны туралы айта кетті. Сондай-ақ Димаштыі концерттері арқылы түрлі елдердің адамдары достасып, мәдени байланыс орнататып жатқанына ерекше қуанышын да жеткізді.