4 қараша күні Испаниядағы Димаштың фан-клубы қазақстандық әншіге деген құрмет белгісі ретінде игі іс жасады. Олар Димаш Құдайбергеннің атынан Sant Joan de Déu Foundation қорына 4000 еуро көлемінде қайырымдылық көмек көрсетті. Аталған қор балалар онкологиясын зерттеу және ауыр дертке шалдыққан кішкентай науқастар мен олардың отбасыларын қолдау бағдарламаларымен айналысады.

Қаражат балалар лейкозын (аққан ауруын) зерттеу жобаларына жұмсалмақ. Қор өкілдері бұл қайырымдылықтың медициналық зерттеулердің дамуына және ем қабылдап жатқан балаларға көмек көрсетуге зор үлес қосатынын атап өтті.

Бұл бастама сәуір айында, Димаштың Испанияға келетіні белгілі болған сәтте пайда болған. Жанкүйерлері Димашқа ең жақсы сыйлық ретінде – әншінің адамгершілік, қамқорлық және мұқтаж жандарға көмек көрсету сынды өмірлік ұстанымдарын бейнелейтін ізгі іс деп шешкен.

Бірнеше ай бойы Dimash Qudaibergen Official Fan Club Spain мүшелері, La Gran Voz Kazaja қауымдастығы және серіктестер жобаны ұйымдастыру бағытында бірлесе жұмыс атқарды. Олар Димаштың өзі үлгі еткен мейірім, бірлік және жанашырлық қағидаттарынан шабыт алғандарын айтты.

Фан-клуб өкілдері қайырымдылық қаражатын табыстағаннан кейін: «Бүгін біз Димаштың үлгі-өнегесі арқылы балаларға қуаныш пен үміт сыйладық», – деп өз ойларын осылайша түйіндеді.