Димаштың жаңа гастрольдік тур аясындағы Мексикадағы алғашқы концерті 12 мың көрерменге арналған Foro GNP Seguros жабық концерт залы мен аренасында өтеді.

Бұл арена — әлемдік және латынамерикалық танымал орындаушылардың гастрольдік сапарлары аясында Юкатанда өнер көрсететін негізгі концерт алаңдарының бірі. Мұнда Maná, Ricky Martin, Luis Miguel және Maluma сынды өнерпаздар концерт берген.

Кешен 2014 жылы ашылып, бастапқыда Coliseo Yucatán деп аталған. Кейін Мексиканың GNP Seguros атты ірі сақтандыру компаниясымен демеушілік жасалған келісім аясында қазіргі атауына ие болды.

Юкатан түбегінің мәдени астанасы қала тұрғындары мен Димаштың концертіне арнайы келген көрермендерге өз өнерін ұсынатын қазақстандық қонақтарды алғаш рет қарсы алмақ.