Ақтөбе қаласының ескі бөлігіндегі көшелердің бірінде кәдімгі кеңестік құрылыстың қарапайым ғимараты орналасқан. Жол бойындағы қабырғада музыкалық ноталар жарқырайды, бұл – Ахмет Жұбанов атындағы музыка колледжі.

Димаш Құдайберген бірнеше жыл осында оқыды.

Бірінші қабаттағы фойеде, «Колледждің мақтанышы» тақтасының дәл ортасынан Димаштың портретін көресіз.

Мұнда сіз жұлдызы жанған ұлдың балалық шағындағы суреттері бар фотоальбомды да байқайсыз. Онда көрерменінің сүйіктісіне айналған әншінің атасымен, ата-анасымен бірге түскен, әртүрлі жарыстарда ән салған сәттегі суреттері жинақталған.

Екінші қабаттағы акт залының жанында Димаш пен тағы бір талантты әнші, сол колледж түлегі — Светлана Касянға арналған арнайы композиция тұр.

Үшінші қабатта болашақ танымал әншінің жеке ән айту шеберлігін шыңдаған аудитория орналасқан.

Оның вокал мұғалімі Марат Әйтімов шәкіртінің дарындылығына әрдайым сенетін. «Мен оның дауысы әлемдегі ең биік сахналардан естілетін уақыт келетініне күмәнім жоқ еді», дейтін ол.

Димаштың жетістігінен біраз уақыт бұрын-ақ ұстаз өзінің сүйікті шәкіртінің портретін әлемге әйгілі әншілердің қатарына іліп қойыпты. Уақыт көрсеткендей, мұғалім қателескен жоқ.

Бүгінгі таңда Марат Әйтімовтің студенттері Димаштың жанкүйерлері сыйға тартқан фортепианомен шеберліктерін шыңдайды.

Жанкүйерлер сонымен қатар колледжде бірнеше кондиционер орнатуға демеушілік жасаған.