9 қарашада Астанадағы Mega Silk Way кешеніндегі «LA’Театрда» белгілі әртістердің қатысуымен концерт-спектакль өтті.

Елордадағы «Sen men Sàt» музыкалық театрының шығармашылық бірлестігінің әртістері Алишер Исмаилов, Динислам Нұрмағанбетов, Дана Верещак, Талғат Кеңес, Ислам Асылхан, Нұржас Садырбаев, Мақпал Дүйсен, Гүлден Курсет сияқты театр қойылымдарында, кинофильмдер және сериалдарда басты рөлдерімен танымал өнерпаздар поэтикалық-музыкалық жанрда өнер көрсетті.

«LA’Театр» сахнасынан көрермендер махаббатқа, отбасы құндылығына, мәдениет пен музыкаға толы хикаят-әуен тыңдады.

Кешке белгілі музыканттар қатысып, өз репертуарларынан бірнеше туындылар ұсынды:

Болат Қобыланды – театр және кино актері, қазақ тіліндегі дубляж маманы, «Жарық» және «Не болды саған?» сияқты хит әндердің авторы және орындаушысы;
және ARShAT (Аршат Хайролла) – әртіс, композитор, музыкант, барлық жанрларда орындаушы, «Unsiz», «Balga men shege», «Kun batqanda» және басқа да көптеген шығармалардың авторы мен орындаушысы.

Әбілмансұр Құдайберген – жас музыкант, ҚазҰӨУ колледжінің электрогитара классы бойынша студенті, мультиинструменталист, автор және аранжировщик өзінің ағасы Димаш Құдайбергеннің репертуарындағы «If I Never Breathe Again», «Omir» және өзінің «Together» атты авторлық композициясын пернетақтада орындады.