8 қараша күні Димаш Құдайберген Испанияда алғаш рет жеке концертін берді. Әншінің жанкүйерлері бұл кешке алдын ала дайындалып, Димаштың авторлық туындысы «The Story of One Sky» орындалған сәтте ерекше акция ұйымдастырды. Бұл бастаманы Испаниядағы ресми фан-клуб қолға алған еді. Компанияның атауы — «Elegimos la Vida», яғни «Біз өмірді таңдаймыз» деп аталды.

Акцияны ұйымдастырушылардың айтуынша, Dears — жай ғана көрермен емес. Олар осындай жобалар арқылы өздерін Димашқа, оның өнеріне жақындай түскендей сезінеді:

«Біз көп мөлшерде ақ қолғаптар сатып алдық. Ақ түс — бейбітшіліктің нышаны. Димаш «The Story of One Sky» әнін орындаған сәтте көрермендерден қолғаптарын киіп, қолдарын жоғары көтеруді өтіндік. Бұл — Димаштың басты үндеуі — бейбітшілікке шақырудың символы елі.

Сондай-ақ, біз алдыңғы төрт қатардағы көрермендерге әріптері бар плакаттар тараттық. Сол арқылы Димаш сахнадан «Біз өмірді таңдаймыз / Elegimos la Vida» деген жазуды испан және ағылшын тілдерінде оқи алды. Барлық Dears Димаштың әндеріндегі басты идеяны — өмір мен бейбітшілікті таңдауды қолдайды».

«Бір аспанның тарихы» әнін алғаш тыңдағаннан-ақ жүрегімізге терең әсер етті. Біз көз жасымызды тыя алмадық… Димаш — ерекше тұлға. Оның ғажайып дарыны музыка шеңберінен де асып түседі, өйткені ол тек әнші ғана емес. Өз үні мен әуені арқылы ол бүкіл әлемге бейбітшілік туралы үндеуін жолдайды.

Димаштың сезімталдығы таңғаларлық. Оның адамгершілігі ерекше. Ол бізді сүйіспеншілікке, үлкен махаббатқа шабыттандырады. Осы тектес концерттер — дәл қазіргі әлемге аса қажет осындай әдемі жобаларды жүзеге асыруға мүмкіндік береді», — деп бөлісті Димаштың жанкүйерлері өз әсерлерімен.