ҚАЗ 
RUS 
ENG 
11 ақпанда продюсерлік «Voice Beyond Horizon» жобасына қызу қолдау білдірген тыңдармандарына алғыс ретінде Димаш Құдайберген «Ғашықтық» атты жаңа композициясын ұсынды. Әннің Mood-бейнебаяны әншінің ресми YouTube арнасында жарияланды.
«Димаш алғаш рет маған жаңа музыкалық туындысын тыңдатқан кезде, оның композициясы толық поэзиямен тұнып тұрғанын сездім. Композиция Димаштың ғарыштық дауысымен үйлесіп, ерекше әсерге бөлейді.
«Ғашықтық» – бұл бір адамға деген терең және ерекше махаббат күйін білдіреді. Ойларыңды, сезімдеріңді және ішкі әлеміңді толтыратын адамға деген сезімді бастан кешіреді. Мұнда күшті тартылыс, эмоционалды байланыс, қасында болуға ұмтылу, ішкі толқу мен шабыт сезімдері үйлеседі.
Димаш бұл сезімдерді әннің әрбір сөзінде және әрбір нотасында көрсете білді», — деп DimashNews редакциясына бейнежүргізуші Галым Асылов мәлімдеді.
Клип минимализм концепциясы аясында түсірілді, бұл көрерменнің назарын басты кейіпкерден, яғни роялде отырған Димаштан ауытқытпайды. 40 музыканттың ерекше сиқырлы орындауының ортасында басты кейіпкер өз сезімдеріне толық беріліп, махаббат хикаясын баяндайды.
«Құрметті достар! Сіздерге шексіз махаббатым мен сіздердің қолдауларыңызға деген ризашылығымды білдіргім келеді. Бұл сезімді сөзбен емес, ән арқылы жеткізгім келеді. Менің авторлық туындым «Ғашықтық» атты шығармамды YouTube арнамнан тамашалай аласыздар.
12 ақпанда біздің «Voice Beyond Horizon» шоуымыздың екінші эпизоды Hunan TV телеарнасында көрсетіледі. Бірінші эпизоды менің YouTube арнама шықты. Елде амандық пен береке болсын! Өздеріңізді құшақтадым!», – деп Димаш өзінің жаңа туындысын таныстыра отырып, жанкүйерлеріне үндеу жасады.
Композитор: Димаш Құдайберген
Сөзін жазған: Димаш Құдайберген
Аранжировка: Еділжан Ғаббасов
Дыбыс араластыру: Ерлан Бекчурин
Режиссер: Ғалым Асылов
