5 ақпан күні Hunan TV және Mango TV телеарналарында «Voice Beyond Horizon» музыкалық реалити-шоуының тұсаукесері өтеді. Жобаның атқарушы продюсері Димаш Құдайберген көрермендерді алғашқы шығарылымды бірлесіп тамашалауға шақырды. Кездесу Алматы қаласындағы Балуан Шолақ атындағы спорт сарайында өтеді. Қазақстан аумағында жоба Qazaqstan телеарнасынан көрсетіледі.

Димаш Құдайберген өзінің ресми парақшасында былай деп атап өтті:
«Біздің байқауымыздың Instagram желісіндегі парақшасына бір түннің ішінде қырық мыңнан астам адам тіркеліпті. Бұл неткен көрсеткіш деп, мәре-сәре боп тойлатып отырмыз. Әрине, сөзімді жерге тастамай, белсенді қолдау көрсетіп жатқан барша ағайынның, жақын жандардың ықыласы мен сенімі — мен үшін зор мәртебе.

Шынын айтқанда, дәуренім жүріп, қуатым кемеліне келіп тұрған осы бір сәтте сіздердің қолдауларыңыздың арқасында елімізге аздаған пайдам тисе менен асқан бақытты адам жоқ деп біліңіз. Байқауымызға жазылып, қолдау білдіріп жатқан барша жандарға мың мәрте алғыс айтамын!

Бұл жоба — баршамызға ортақ. Халықтың мүддесі де, қуанышы да ортақ. Сол себепті байқаудың алғашқы кезеңінің тұсаукесерін бүкіл Қазақстан болып, бір үлкен отбасыдай бірге тамашаласақ деген ниетім бар. Яғни, жобаның алғашқы шығарылымын сіздермен бірге тамашалағым келеді.

Келемін деушілерлің барлығына есік ашық. Билет сатып алудың қажеті жоқ. Бәріміз бірге жиналып, жақсы көңіл күйде уақыт өткізуге шақырамын», — деп үндеу жасады өнер иесі.

5 ақпан
Балуан Шолақ атындағы спорт сарайы.
Алматы қаласы, Абай даңғылы, 44
Кездесудің басталуы: 19:00
Кіру уақыты: 17:00-ден басталады.

0 теңге билет­терді TICKETON сайтынан алуға болады.
http://ticketon.kz/event/dimash-kudaybergen-priglashaet-k-sovmestnomu-prosmotru