12 қазанда Димаштың «When I’ve Got You» әні тоғыз Match FM радиостанциясы арқылы бүкіл Мексикада бір уақытта таратылған Conteomatch бағдарламасында ұсынылды.

Композиция Пуэрто-Вальярта (98,5 FM), Пуэбла (90,1 FM), Гвадалахара (90,3 FM), Морелия (93,9 FM), Леон (97,5 FM), Керетаро (97,9 FM), Кульякан (100,1 FM) және Мехико (99.3 FM) сияқты қалаларда орындалды. Осылайша ән қалың тыңдарманға жол тартып, жанкүйерлерге сүйікті өнерпазының шығармашылығынан ләззат алуға мүмкіндік берді.

Acir тобы мен халықаралық iheartradio желісінің бөлігі болып саналатын Match FM радиосы Мексикада да, шетелде де өз толқындарында таратылатын әндер мен бағдарламаларды насихаттайды.

Мексикалық Dears биылғы жылдың тамыз айында олармен кездесу ұйымдастырып, Димашты кең аудиторияға таныстыруға мүмкіндік берген Мехикодағы Match 99.3 FM радиостанциясына ерекше алғысын білдіреді.

Жанкүйерлерімен тығыз байланыста болған жүргізуші Джари оларды құшақ жая қарсы алып қана қоймай, тыңдармандардың әртіспен жақынырақ танысуына жағдай жасады.

Сондай-ақ, Джари қазақстандық әншінің шығармашылығын таныту мақсатында TikTok желісінде тікелей эфир де жүргізді.