2025 жылдың 12 сәуірінде Прагада қазақ халқының көктем, жаңару мен бірліктің символы болып саналатын басты мерекелерінің бірі – Наурыз мейрамын салтанатты түрде тойлады. Шараны Qazaq Nomad мәдени бірлестігі Прага-4 ауданы әкімшілігінің қолдауымен ұйымдастырды.

Фестиваль халықаралық мәдени алмасу алаңына айналды. Шараға Қазақстан, Катар, Чехия, Германия, Қырғызстан, Өзбекстан, Тәжікстан және Ауғанстан елдерінің өкілдері қатысты. Қонақтар қазақтың ұлттық тағамдарынан ауыз тиіп, халықтық қолөнер мен дәстүрлі киімдермен танысып, жанды қазақ әуенін тыңдап, концерттік бағдарламаны тамашалады.

Фестивальға Димаш Құдайберген өнерінің чех жанкүйерлері Czech Dears-тың қатысуы ерекше назар аударатын жағдай болды. Олар арнайы естелік ретінде суретке түсу үшін сүйікті әншілерінің баннерімен фотоаймақ дайындады. Шараның музыкалық бөлігінде мерекенің халықаралық сипатын аша түскен Димаштың әндері де орындалды.

Ұйымдастырушы Дарина Жұмағұл барлық қонақтарға фетивальге қатысқандары үшін алғысын білдіріп, халықтар достығының нығаюына мұндай шаралардың маңыздылығын атап өтті. Қатысушылар бұл фестивальдың дәстүр ретінде жалғасын тауып, келесі жылы да өтетініне сенім білдірді.