Әрқайсымыздың кем дегенде бір рет әйгілі ойжұмбақтың барлық қырларындағы түстерін – Рубик текшесін жинауға тырысқанымыз белгілі. Тимур Омаров, жас болғанына қарамастан, мұны санаулы секундтарда жасап қана қоймай, оның көмегімен тұтас картиналар жасайды.

Он екі жасар алматылық Тимур Омаров №78 мектеп-гимназиясының 7-сыныбында оқиды. Жасөспірім Тимурдың көптеген қызығушылықтары бар: ол ағылшын курстарына қатысады, дзюдомен айналысады және «Шаг» Компьютерлік академиясында бағдарламалауды оқиды.

Баланың сүйікті хоббиінің бірі – бүкіл әлемге танымал ойжұмбақ Рубик текшесі, оны Тимур шамамен бес жыл бұрын жинауды үйрене бастады. Оның ойжұмбаққа деген қызығушылығы өздігінен пайда болды. Үйде осындай текшені көрген Тимур оны қалай жинауды білгісі келіп, қызығушылық танытты.

Блогер Евгений Бондаренконың YouTube каналындағы бейнелерді көріп, алдымен 3×3, содан кейін 4×4, 5×5 және 6×6 текшелерін игерді.

Бірақ Тимур қарапайым құрастырумен тоқталып қалған жоқ. Әлеуметтік желілер үшін қызықты нәрсе түсіргісі келгенде, ол текшелерден жиналған портреттерді кездестірді. Жасөспірім көргендерінен қатты әсер алып осындай дүниелерді жасауға шешім қабылдайды. Оның алғашқы картинасы сүйікті анасының портреті болды.

Осындай бір жұмыс 500 текшеден тұрады. Бір жағын жинауға шамамен 10-14 секунд, ал бүкіл суретке шамамен 2 сағат кетеді.

Портретті жинауды бастамас бұрын, Тимур Photoshop-та қажетті фотосуретті өңдейді, пиксельге бөледі, қажетті түсті түзетуді жасайды, содан кейін құрастыруды бастайды.

Осы жылдан бастап Тимур мұндай суреттерді үнемі жинауды әдетке айналдырды, көптеген пікірлер мен қолдауды тек отандастардан ғана емес, сонымен қатар шетелдегі адамдардан да ала бастады.

Оның портфолиосында Уилл Смит, Джонни Депп, қазақстандық рэпер Скриптонит, боксшы Геннадий Головкин және басқа да атақты адамдардың портреттері бар.