Қызыл кілем, қазақстан эстрада жұлдыздарының өнері, жарқыраған сахна және ерекше рух беретін көңіл-күй – Baqytty Bala балалар ән байқауының ІІІ маусымы осылай мәресіне жетті.

Baqytty Bala-2021 байқауының қорытынды гала- концертіне арналған шара 11 тамыз күні жергілікті уақытпен 17:00 де басталды. Өнер орталығы алдына жайылған қызыл кілеммен шараның құрметті қонақтары мен өткен маусымның қатысушылары жүріп өтті.

Ақтөбе облыстық филармониясының “Аққу” би ансамблінің “Ұлы дала” қойылым биімен гала -концерт шымылдырығы ашылды.

Салтанатты шарада “Витебскдегі Славян базары” фестивалінің Гран-при иегері Рухия Байдүкенова, қазылар алқасының мүшесі, Өзбекстанның танымал әншісі Сильвия Де Оноре (Андрианалариманга), “Балалар дауысы” байқауының 6 маусым жеңімпазы Ержан Максим және I«Junior Eurovision» байқауының ІІ орын иегері Қарақат Башанова Baqytty Bala байқауының өткен маусымдағы Димашпен сахнаға шығуға мүмкіндік алған жас өнерпаздары Наргиз Жанұзақ пен Әйкерім Төлеубек сахнаға шығып өнер көрсетті.

Конкурс режиссері Анны Обоянсктің сценографиясы көптің көңілінен шығып, ерекше әсер қалдырды.

Концерттік бағдарламадан соң ІІІ маусым қатысушылары сахнаға шақырылып, номинация бойынша марапатталды. Baqytty Bala байқауының негізгі сыйлықтарынан өзге оларға фестиваль демеушілері атынан да сыйлықтар берілді. Ақтөбедегі “Ақбөбек” мектебі атынан смартфон мен гүл шоқтары берілсе, Димаштың әлемнің әр түпкіріндегі Dear лар атынан Қазақстан туралы эксклюзивті арт кітабы табысталды.

Одан соң байқаудың ең қобалжулы сәті жеңімпаздар марапаты басталды. Жүлделі орыннан бөлек әр финалист ҚР мәдениет министрлігі, Ұлықпан Жолдасов, Ерлан Бекчурин, Рухия Байдүкенова және Димаш Құдайбергеннің 50 елден жиналған жанкүйерлері атынан арнайы сыйлықтарға ие болды.

Естеріңізге сала кетсек, байқаудың қорытындысы бойынша Гран-приді Тараздан келген 13 жастағы Айлун Заушева жеңіп алды. Жас өнерпазға 1 миллион теңгенің сертификатын Ақтөбе облысының әкімі Оңдасын Оразалин табыс етті.

Қатысушылардың біріне Димаш Құдайбергеннің өзі арнайы сый дайындаған болатын. Марапат кезінде көптің көңілін елең еткен осы болды, ол кімге бұйырады?

Әнші таңдауын сахнада өзі хабарлады. Ең ерекше сыйлық – Димаштың жеке концертіне жолдама алып, онымен бірге бір сахнада ән салу бақыты Нұр-Сұлтан қаласының 12 жастағы тұрғыны Адель Құнәділоваға бұйырды.