Маусым айының соңғы аптасында Өзбекстан Дүниежүзілік жастар фестиваліне әлемнің жүздеген елінен мыңға жуық қатысушыны жинады.  Фестиваль өтетін орындар Ташкент, Бұхара, Самарқанд, Джизах және Хорезмде орналасқан. Белгілі спикерлердің шеберлік сабақтары мен білім, бизнес, денсаулық сақтау, спорт, өнер салаларындағы форумдар, конференциялар мен турнирлер сияқты көптеген іс-шаралар жаңа буынның белсенді жас көшбасшыларын біріктірді.

Фестивальдің Гала-концертінде Димаш Құдайберген өнер көрсетті. Humo Arena көрермендері қазақстандық әншіні жылы шыраймен қарсы алды.

Алдымен Димаш «SOS d’un terrien en distresse» композициясын орындады. Бұл ән көптеген музыкалық байқауларда жеңіске жетелеген әншінің темірқазық жұлдызы болып саналады. Бұл әнді 2019 жылы Димаш Ташкентте Өзбекстандағы Қазақстан жылының ашылуында шырқаған болатын.

Артынша Димаш танымал түрік диджейі Бурак Йетермен бірлескен жоба негізінде жазылған фестивальдің шуақты көңіл-күйіне сәйкес «Weekend» әнін орындап, көрерменнің қошеметіне бөленді.