15 қараша күні Димаш Құдайбергеннің мексикалық жанкүйерлері қайырымдылық мақсатында қаржы жинау акциясын өткізіп, оның нәтижесінде 8 400 мексикалық песо (шамамен 458 АҚШ доллары) жиналды.

Жиналған қаражат екі бөлікке бөлінді: оның бір бөлігі Халықаралық көші-қон ұйымына (ХКҰ) ресми фандрайзер арқылы аударылса, екінші бөлігі Веракрус штатында болған қатты су тасқынынан зардап шеккен отбасыларды қолдауға бағытталды.

Димаштың жанкүйерлері сонымен қатар жергілікті жердегі атаулы көмек көрсетуді де ұйымдастырды. Әр апта сайын мұқтаж жандарға азық-түлік жинаумен айналысатын жергілікті еріктінің көмегімен 30 түрлі азық-түлік себеті дайындалды. Бұл себеттер табиғи апаттан кейін әлі де жеткілікті көмек ала қоймаған Аламос қалашығындағы 30 отбасыға таратылды.

Мексикалық фан-клуб мүшелері қаржы тарту жұмыстарын жалғастыруға ниетті екендерін және аталған бастамаға қосылғысы келетін кез келген ұйымдармен немесе жекелеген азаматтармен ынтымақтаса жұмыс істеуге дайын екенін атап өтті. Байланыс деректері мен жаңартылған ақпарат фан-клубтың әлеуметтік желідегі парақшаларында қолжетімді.