Димаш Құдайбергеннің жанкүйерлерін біріктіретін New York Dears жанкүйерлер қауымдастығына Нью-Йорктегі Қазақстан Республикасының Бас консулдығының алғыс грамотасы табысталды. Марапатты Қазақстан Республикасының Бас консулы Рауан Тлеулин қауымдастықтың қазақстандық мәдениетті дәріптеуге және мәдени байланыстарды дамытуға қосқан үлесін жоғары бағалап табыстады.

New York Dears қауымдастығының Қазақстанның Бас консулдығымен ынтымақтастығы 2019 жылы Димаш Құдайбергеннің Нью-Йорктегі Barclays Center орталығында өткен алғашқы жеке концерті кезінде бастау алған болатын. Содан бері бұл іскерлік қарым-қатынас өзара құрмет пен Қазақстанның мәдени мұрасына деген қызығушылыққа негізделген берік, ұзақ мерзімді серіктестікке айналды.

Бірнеше жылдан бері New York Dears қауымдастығының мүшелері Қазақстанның Бас консулдығы мен Нью-Йорктегі қазақстандық қоғамдық ұйымдар ұйымдастыратын түрлі мәдени іс-шараларға тұрақты түрде қатысып келеді. Олардың қатарында Наурыз мерекесін атап өту салтанаты мен Қазақстан Республикасының Мемлекеттік Туын көтеру рәсімдері де бар.

Аталған кездесулер қазақстандық диаспора өкілдері мен Димаш шығармашылығының халықаралық жанкүйерлер қауымдастығы арасындағы мәдени алмасуды дамытуға, өзара достық байланыстарды нығайтуға ықпал ететін маңызды алаңға айналды.