Қыркүйектің 15-і күні Астанадағы Бейбітшілік және келісім сарайында қазақтың атақты қобызшысы Олжас Құрманбектің концерті өтті. Концертке қазақтың көне аспабын құрметтейтін өнерсүйгіш жанкүйерлер жиналды.

Концерт «Saz & Soul» қобыз виртуозы ішекті аспаптар оркестрі тобымен және қобызшы Санжай Әлмішевпен бірге орындаған Олжастың «Nomad» шығармасымен басталды.

Әйгілі фильмдерге арналған саундтректердің бірегей аранжировкалары көрермендерге әртүрлі оқиғалар желісін баяндап отырды. Қобыздың сиқырлы үндері «Дюна» фильміндегі құмның сырын ашса, «Батыл жүрек» пен «Гладиатор» фильмдеріндегі шайқас даласынан жүріп өтіп, «Сұлтан Сүлейман» (“Muhteşem Yüzyıl”) мен «Титаниктің» махаббат хикаяларын баяндап тыңдарманды мұңға батырды. «Миф» және «Тақтар ойыны» (“A game of thrones”) фильмдеріндегі қиял әлемі және қазақтың «Шал» фильмінің драмалық оқиғасын баяндады.

Бұл кеште Puza диджеймен бірлесіп орындаған Билли Эйлиштің «Lovely» және Лориннің «Tattoo» заманауи хиттерінің ремикстерін орындаған Олжас ұлттық аспаптың кез келген жанрда шырқалатынын көрсетті.

Кеш қонақтары домбырашылар Темірлан Олжабай мен Ернат Наурыз дуэті болып «Бастау» және «Әлем» композицияларын орындаса, Олжаспен бірге олар «Заман» атты ортақ хитін көрерменге паш етті.

Гитарист Мұрат Зайнула қазақтың «Дударай» әнін күтпеген интерпретациясымен көрерменді тәнті етті.

Әйгілі композитор Ренат Гайсин пернетақта мен мелодикада орындаған «Махаббат өзені» және «Angel love» атты төл туындыларымен көрермендерге ерекше сезім сыйлады.

Концерттің арнайы қонағы Димаш Құдайберген болды. Қонақтармен сәлемлесіп, Олжасты құттықтау сөзінде Димаш:

«Еліміздің мәдениетінің дамуына ерекше үлес қосып жүрген осындай досымның барына өте қуаныштымын. Болашақта Олжастың ізбасарлары мен шәкірттері дәл осындай үлкен сахналар мен ареналарда өнер көрсетеді деп сенеміз. Қазіргі қазақ мәдениетінде Олжастай қобызшылар жоқ деп есептеймін. Шығармашылық жолының ізбасарлары көп болсын деп тілейік»- деп тілек білдірді.

Димаш Олжастың өнерін қолдап, Олжас пен Темірланмен бірге Құрманғазының «Адай» күйін домбырамен орындады.