2026 жылғы 1 маусымда Слупск қаласындағы №2 бастауыш мектепте білім беру және мәдениетаралық ынтымақтастық бастамалары аясында Қазақстан Республикасының мәдениетін таныстыруға арналған іс-шара ұйымдастырылды.

Кездесуге білім беру ұйымдарының, қоғамдық бірлестіктердің өкілдері, сондай-ақ Димаш Құдайбергеннің поляк фан-клубының мүшесі Тереза Какол (Teresa Kąkol) қатысты.

Іс-шара барысында қатысушыларға қазақ халқының мәдениеті, дәстүрлері, тарихы мен Қазақстанның өнер саласындағы заманауи жетістіктері туралы жан-жақты ақпараттар да айтылды. Сонымен қатар, шығармашылық қызметі арқылы әлемдік қауымдастықтың Қазақстанның мәдени мұрасына деген қызығушылығын арттырып жүрген қазақстандық өнерпаз Димаш Құдайбергеннің шығармашылығына ерекше назар аударылды.

Қонақтар мәдени алмасуды дамытуға және Польша мен Қазақстан арасындағы гуманитарлық байланыстарды нығайтуға бағытталған жобаларды жүзеге асырып келе жатқан Димаш Құдайбергеннің поляк фан-клубының қызметімен де танысты.

Ұйымдастырушылар мұндай кездесулер білім беру, мәдениет және өнер салаларындағы халықаралық ынтымақтастықты кеңейтуге, сондай-ақ елдер арасындағы өзара түсіністік пен серіктестікті дамытуға ықпал ететінін атап өтті.