Словакиялық және чехиялық Димаш Құдайбергеннің жанкүйерлері Братиславада өткен түркі мәдениеттерінің Silk Road Fest фестиваліне қатысып, шара қонақтарына өнер иесінің шығармашылығы мен DIMENSIONS әлемдік туры туралы таныстырды.

Фестиваль сегіз елдің өкілдерін біріктірді. Бағдарлама аясында түрлі халықтардың ұлттық музыкасы, дәстүрлері мен тағамдары таныстырылды.

Dears жанкүйерлерінің бірлескен стендінде фестиваль қонақтары Димаштың әндерінің аудармаларымен танысып, QR-кодтар арқылы оның музыкаларын тыңдау мүмкіншілігіне ие болды. Сондай-ақ пернетақта көмегімен әншінің вокалдық диапазонының көрнекі бейнесі көрсетілді. Балалар үшін жанкүйерлер қазақ және словак мәдениеттеріне арналған шығармашылық іс-шаралар ұйымдастырды.

Словакиялық және чехиялық Dears фестиваль сахнасында да өнер көрсетіп, Димаштың шығармашылығы туралы пікір алмасып, оның «Unforgettable Day» әнінен үзінді орындады. Шара соңында көрермендерге әншінің DIMENSIONS әлемдік туры мен Еуропада өтетін алдағы концерттері туралы мәлімет берілді.

Silk Road Fest фестивалін Kazan қазақ мейрамханасы ұйымдастырып, қонақтарға қазақтың дәстүрлі ұлттық тағамдарын таныстырды.