Мексиканың Чиуауа қаласында Димаш Құдайбергеннің жанкүйерлері «Dimash, the Voice That Unites the World» атты арнайы іс-шара ұйымдастырды. Шара әншінің шығармашылығына және оның Мексикада өтетін алдағы концерттеріне арналды.

Қаладағы білім беру ұйымдарының бірінде студенттерге Димаштың екі шағын концерті көрсетілді. Жас көрермендерге әншінің шығармашылық жолы мен оның музыкалық туындылары таныстырылды. Іс-шараға 200-ден астам студент пен оқытушы қатысты.

Көрсетілімдерден кейін әншінің шығармашылығына қатысты сұрақ-жауап сессиясы өтті. Сонымен қатар қатысушыларға Димаштың Мексикада өтетін алдағы концерттерінің қалалары мен күндері туралы хабар беріліп, ақпараттық материалдар таратылды, сондай-ақ сыйлықтар ұтысы ұйымдастырылды.

Ұйымдастырушылардың айтуынша, бастаманың басты мақсаты – жаңа аудиторияны Димаштың шығармашылығымен таныстырып, жастардың оның музыкасына деген қызығушылығын арттыру.