13 маусым күні сағат 20:00-де Almaty Theatre сахнасында тәуелсіз театрлық жоба – «Сізді сүйем…» музыкалық драмасының премьерасы өтеді.

Қойылым махаббат, күрделі таңдау және кейіпкерлер бетпе-бет келетін ішкі қайшылықтар туралы баяндайды. Алайда спектакль тек жеке тағдырларды ғана емес, сонымен қатар адамның Алматымен рухани байланысы, мәдени жады және қалалық бірегейлік тақырыптарын да қозғайды.

Жобаның негізгі идеяларының бірі — Алматы бейнесін руханияттың, эстетиканың және шығармашылық интеллигенцияның орталығы ретінде қайта пайымдау болды. Спектакльдің көркемдік тұжырымдамасында қаланың символдары — алмалар, алма бақтарының хош иісі және Алматының өзі тірі эмоционалдық бейне ретінде ерекше орын алады. Оқиға желісі қаланың тарихи және мәдени маңызы бар орындарында өрбіп, өткен мен бүгіннің арасындағы байланысты көрсетеді.

Пьеса авторы – Қ. Мұрат, композиторы – Ә. Омарова. Қойылым режиссері — Қазақстанның еңбек сіңірген қайраткері Алма Кәкішева. Жобаның продюсері әрі басты рөлді сомдаушы Перизат образын сахналаған актриса — Индира Құлмағамбетова.

«Біз бұл спектакльді қазақ театр өнерінің шебері, педагог, профессор, Қазақстанның халық әртісі Есмұхан Обаевтың рухына арнауды жөн көрдік. Бұл — ұстазымызға деген құрметіміз бен рухани алғысымыздың белгісі», — деді актриса.

Қойылымға сондай-ақ Қасым Демеу, Қуаныш Қонысбеков, Әйгерім Қайратқызы және Елшат Мәметеков қатысты.

Спектакльдің жас ерекшелігіне байланысты шектеуі — 14+.

Билеттер: https://ticketon.kz/theatres/event/tckt2-spektakl-sizdi-suyem