18-24 тамыз аралығында қазақ музыка өнерін әлемге танытқан ұлы композитор Ахмет Жұбановтың және Қазақстан Халық әртісі Димаш Құдайбергеннің туған жерінде алтыншы рет «Baqytty Bala – 2025» ашық балалар вокалдық фестиваль–байқауы өтеді.

2018 жылы өңір әкімінің бастамасымен басталған бұл фестиваль жыл сайын Ақтөбе облысы әкімдігінің және «ДимашАли»шығармашылық орталығының қамқорлығымен Ақтөбеде өтеді.
___

Қазылар алқасы қатысушылардың аудио және бейнежазбаларын қашықтықтан бағалаған байқаудың бірінші кезеңінде Чехия, Франция, Ұлыбритания, Колумбия, Литва, Беларусь, Молдова, Қырғызстан, Ресей, Өзбекстан, сондай — ақ Қазақстанның түрлі қалалары мен облыстарынан 200-ден астам өтінім жиналды.

Байқаудың екінші кезеңі Ақтөбедегі «Өнер орталығы» концерт залында офлайн форматта өтеді. Финалистер бір ана тіліндегі және бір әлемдік (немесе авторлық) екі композицияны орындайды.

Бірінші кезеңнің қорытындысы бойынша байқаудың финалистері:

Лев Смертин (Молдова), Сафина Самиева (Қырғызстан), София Рустамова (Беларусь), Лайло Хафизова (Өзбекстан), София Фадеева, София Асадулина, Арсений Бардин, Кирилл Усов, Алина Аракелян Ресейден және Қазақстанның әртүрлі аймақтарынан келген қатысушылар атанды.

Фестивальде Әлихан Нұрлыбек (Астана), Мирас Нағашыбай (Алматы), Кәусар Медерқұл (Тараз), Мөлдір Базарбай (Орал), Әлихан Өтеген (Талдықорған), Айару Кимағанбет және Ақтаудан Амина Асгатова, Атыраудан Абылай Нұрсұлтан мен Нұршат Құсанова, сондай –ақ Ақтөбеден Азамат Орынғали мен Мөлдір Әбдірова өнер көрсетеді.

– Финалға қатысушылардың жасы — 11 — ден 16 жасқа дейін.

Байқаудың қазылар алқасы мәдениет пен өнердің көрнекті қайраткерлерін таныстырды:

• Борис Александрович Стаценко (қазылар алқасының төрағасы) – баритон, «Новая опера» театрының және Евгений Колобов атындағы Үлкен театрдың солисі (Мәскеу қ.), бүкілресейлік байқаулардың лауреаты, «Meistersänger»атағының иегері;
•  Светлана Ермекқызы Айтбаева-Қазақстанның еңбек сіңірген қайраткері, «Құрмет» орденінің иегері, Астана қаласы Мемлекеттік Академиялық филармониясының солисі;
•  Қарлығаш Исақызы Әжиева – Қазақстанның еңбек сіңірген қайраткері, режиссер (Алматы қ.);
• Аллаберген Башбайұлы Жақсабаев – ҚР Мәдениет қайраткері, Ғ. Жұбанова атындағы облыстық филармония жанындағы «Дауыс» вокалдық ұжымының көркемдік жетекшісі (Ақтөбе қ.);
• Алмагүл Батталиева – «Славян базары–2025» халықаралық байқауының Гран-при иегері, Данеш Ракишев атындағы филармонияның солисі (Талдықорған қ.).

Байқау жеңімпаздары 23 тамызда «Өнер орталығы» концерт залында өтетін Гала-концертте жарияланады. Басталуы: сағат 16.00-де.