8 қыркүйекте Астанада V Дүниежүзілік көшпенділер ойындарының салтанатты ашылу рәсімі өтті. Оған этникалық спорт түрлерінен өздерінің мықты қырларын көрсетіп бағатын 2500-ден астам спортшы жиналды.

Дүниежүзілік көшпенділер ойындары 2014, 2016 және 2018 жылдары Қырғызстанда, 2022 жылы Түркияда өткен болатын. Ал 2024 жылы Қазақстанның астанасы 90-ға жуық елден қонақтарды қабылдайды. Дүниежүзілік көшпенділер ойындары ЮНЕСКО-ның материалдық емес мәдени мұралар тізіміне енеді.

Ойындардың ашылуы «Астана Арена» стадионында өтті. Қатысушы командалардың салтанатты маршы, шығармашылық топтар мен танымал өнерпаздардың өнер көрсетуі спортшылар мен кеш қонақтарына ерекше әсер сыйлап, бірлік пен халықтар достығының беріктігін көрсетті.

Ашылу салтанатын аяқтау құрметі Қазақстан Республикасының халық әртісі Димаш Құдайбергенге берілді. Қазақстандық өнерпаз «Киелі мекен» композициясын орындады. Әннің әуенін қазақ композиторы Ерболат Құдайберген жазса, сөзі DimashAli шығармашылық орталығының жетекшісі Қанат Айтбаевтікі.

Рок пен этникалық стильді біріктіретін күшті музыка стадионды бірден өзіне баурап алды. Әнші әнінің сөзі мен әуені арқылы еліне, халқына, ұлтына деген сүйіспеншілік пен шексіз мақтаныш сезімін дәріптеді. Кез келген тұлға үшін қасиетті нәрсе – тамыры тереңге жайылған ата-бабасы мен атадан қалған мұраны құрметтеу екенідігін тағы да бір дәлелдеді.