Димаштың туған күні қарсаңында жанкүйерлері дәстүрлі түрде түрлі қайырымдылық шараларын ұйымдастырады. “Phoenix Twitter Dears” халықаралық фан-клубы Алматыдағы онкологиялық ауруға шалдыққан балаларға арналған хосписке қолдау көрсетуді ұйғарды.

«Балалардың жанарында ғажайыптар, періштелердің күлкісі мен мейірімге толы ертегілер өмір сүреді дейді… Алайда бұл балалардың көзқарасының ар жағында төзгісіз ауырсыну, қорқыныш пен өмірге деген зор құштарлық жатыр», – деп өз әсерлерімен бөлісті Dears өкілдері.

Өнер иесінің жанкүйерлері «Мен сенімен біргемін» атты балаларға паллиативтік көмек көрсету орталығына жасаған сапары туралы былай дейді:

«Біз, ең алдымен, өмірлік қиын жағдайға тап болған балаларға үнемі көмек көрсетіп жүретін Димаштың өзінен шабыт аламыз. Бұл орталық қайырымдылық қаражаттарының есебінен жұмыс істейді. Сондықтан оның туған күніне орай осы хосписке қаржылай көмек көрсетіп, кішкентай балаларға қолдан келгенше қолдау білдіруді жөн көрдік.

Қазіргі уақытта орталық Алматы қаласында екінші, яғни қалалық корпустың құрылысын жүргізіп жатыр. Бұл үшін қаражат қажет, себебі арнайы медициналық жабдықтар сатып алынуы тиіс. Қазір жөндеу жұмыстары жүргізілуде, кейін қажетті құрал-жабдықтар алынады. Болашақта мұнда онкологиялық және өзге де ауыр дертке шалдыққан балаларға, соның ішінде жаңа туған нәрестелерге арналған палаталар ашылады».