Бангладешке гуманитарлық миссия аясындағы іссапары барысында БҰҰ-ның көші-қон мәселелері жөніндегі жаһандық ізгі ниет елшісі Димаш Құдайберген Халықаралық көші-қон ұйымының мәжбүрлі қоныс аударушылар тіршілігін қамтамасыз ету бағытындағы қызметімен танысты. Ол жергілікті тұрғындардың мұң-мұқтажын тыңдап, туған жерін амалсыз тастап кеткен отбасылардың ауыр тағдырларына қанықты.

Сондай-ақ Кокс-Базардағы лагерьлердің бірінде Димаш үндеу жолдады:

«Қазіргі уақытта мен әлемдегі ең ірі мәжбүрлі түрде қоныс аударушылар лагері орналасқан Кокс-Базардамын.

Мен мұнда Халықаралық көші-қон ұйымы мен оның серіктестерінің рохинджа мәжбүрлі қоныс аударушылары мен қабылдаушы қауымдастықтарға көрсетіп жатқан ауқымды көмегінің куәсі болдым. Бұл қолдау арқылы қауіпсіз баспана және күнделікті қажетті заттар, соның ішінде тамақ әзірлеуге арналған таза отын, медициналық және психологиялық көмек көрсетуге дейінгі кешенді шаралар қамтамасыз етіледі.

Сондай-ақ мен ақсақалдар мен ақ жаулықты әжелердің, әке мен шешенің және сәбилердің жүрек сыздатар тағдырларымен таныстым. Олардың ең үлкендері өз үйлерін бірнеше мәрте тастап кетуге мәжбүр болса, ал ең кішкентайлары дәл осы Кокс-Базарда дүниеге келген.

Менің бұл жерден жолдайтын үндеуім қарапайым: ынтымақтастық, қолдау және мәселені шешу. Рохинджа мәжбүрлі қоныс аударушыларын еш естен шығармайық!»