18 қазан күні TV Azteca телеарнасында көрсетілетін Hechos Sábado бағдарламасы аясында Димаш Құдайбергеннің Мексика телеарнасына берген алғашқы сұхбаты эфирге шықты.

Әнші 8 және 10 қазанда Мехикода өткен жеке концерттерінің алдында мексикалық телеарна студиясының қонағы болды.

Бағдарламаның жүргізушісі Габриэль Эрнандес қонағын таныстыра отырып, былай деді:

«Димаш Құдайберген – мыңдаған тыңдармандарын тамсандырған қазақ әншісі. Ол өзінің ерекше даусымен, тартымды харизмасы және жанкүйерлерінің зор қолдауымен мұхит асып, сонау Қазақстаннан осында триумфпен келді».

Ағылшын тілінде өткен сұхбат барысында Димаш музыкамен кәсіби түрде бес жасынан айналыса бастағанын және әлі күнге дейін білімін жетілдіріп келе жатқанын айтты.

Әнші Лос-Анджелестегі Геннадий Головкин мен Канело Альварес арасындағы бокс жекпе-жегінің алдында өнер көрсеткен сәтін еске алып, өзі бокстың үлкен жанкүйері екенін және бұл спорт түрін жақсы білетінін атап өтті.

Репортажда ерекше атап өтілген жайт – Димаш міндетті түрде, бара жатқан елдерінің мәдениетін терең зерттейді екен. Мұны дәлелдей түсу үшін ол мексикалық тарихшы әрі философ Хосе Васконселостың: «Нағыз қуанышты тек таза рух қана біледі», — деген сөзін келтірді:

Сондай-ақ, Димаш өз тыңдармандарына алғысын білдіріп: «Менің шығармашылық жолымды жалғастыруыма, алға ұмтылуыма және өзімді жетілдіруге себеп болатын күш – ол менің жанкүйерлерім», – деді.

Журналисттің «Сіз үшін кемелдік деген не?» деген сұрағына Димаш былай жауап берді:

«Кемелдік – бұл әрбір іске бүкіл жан-тәніңді, барлық күшіңді салу. Музыкант болсын, басқа маман иесі болсын – бәрінен бұрын адамгершілік танытып, бір-бірімізді жақсы көру, қолдау және әлеммен тек жақсылықты бөлісу – адамзат үшін маңызды қасиеттер болып саналады».