Қазақстан мен Қырғызстанның халық әртісі Димаш Құдайберген Чолпон-Ата қаласында өткен «Мейкин Азия» IV халықаралық музыка фестивалінің жабылу салтанатында арнайы қонақ ретінде өнер көрсетті.

Шілде айында Азияның інжу-маржаны саналатын Ыстықкөлдің жағасына төртінші рет дарынды жас музыканттар басқосты. Биылғы жылы Қырғызстанда Еуропа, Азия және Оңтүстік Америка елдерінен 25 үміткер жиналды. Әр түрлі елдің ұлттық музыкалық нақыштарына қаныққан өнер иелері Еуразияның музыкалық фестивальдері арасындағы елеулі жүлде – Гран-при иегері атану үшін әлемге өз өнерлерін паш етуде. Фестивальге Қазақстаннык атынан әнші Бекжан Қайратұлы қатысты.

Байқаудың бірінші күні — фестивальге қатысушылар ана тілдерінде ән орындап, өз елдерінің мәдени дәстүрлерін көрсетсе, ал екінші күні — фестиваль қатысушылары әлемнің әртүрлі тілдеріндегі шығармаларын орындап, фестивальдің халықаралық рухын көтерді.

Құрамында 7 елдің музыка саласының танымал өкілдері бар құзырлы қазылар алқасына онлайн-дауыс беру барысында фестиваль көрермендері де көмектесіп, атсалысты.

«Мейкин Азия» IV халықаралық музыка фестивалінің Гран-при иегері Румыния әншісі Мария-Диана Стинчуляша атанды.

Үш күнге созылған фестивальдің әр күнінде байқауға қатысушылар ғана өнер көрсетіп қоймай, Джийдеш Идирисова, Bayastan, «Номад» триосы сынды және т.б. Қырғызстаннан шақырылған әртістер де ашық аспан астында өз туындыларын орындады. Басқа елдерден шақырылған қонақтар қатарында ресейлік музыканттар Севак Ханагян мен «Ай Йола» тобы және Моңғолияның Үлкен ұлттық өнер театры мен Моңғол мемлекеттік ұлттық оркестрінің әртістері де болды.

I Халықаралық «Мейкин Азия» музыкалық фестивалінің Гран-при иегері Димаш Құдайберген өзінің өнер жолының бастауында тұрған шараның жабылу салтанатының арнайы қонағы ретінде келіп, қолдау көрсетті.

Қазақстандық жас өнерпаздың байқауда жеңіске жеткеніне 2013 жылдан бері 12 жыл өтті. Сол жылы Димаш «Дайдидау» атты қазақтың халық әнін орындап, жеңіске жеткен болатын.

Одан кейінгі жылдары Димаш екінші фестивальге қонақ ретінде 2015 жылы «Джамайка» және «Дайдидау» әндерімен, ал 2023 жылы «Қайран елім» әнімен онлайн форматта өнер көрсеткен еді.

22 шілдеде «Мейкин Азия» IV халықаралық музыка фестивалінде Димаш музыка аспаптарының шеберлері Темірлан Олжабай, Ернат Наурыз, Мансұр Құдайберген және DQ-band би тобының сүйемелдеуімен кеңейтілген ерекше бағдарламасын ұсынды.

Көрермендер Димаштың орындауында бай аранжировкасымен жаңадан өмірге келген — «Дүрдараз» және биылғы жаздың хитіне айналған «Тау ішінде» халық әндерін; маэстро Игорь Крутой жазған «Stranger» және «Любовь уставших лебедей» классикасына айналған шығармаларын; сондай-ақ нағыз «фестивальге» арналған түрік диджейі Бурак Йетермен орындаған «Weekend» және Димаштың «Give me your love» атты түпнұсқа композициясын тыңдап, ерекше көңіл-күйге бөленді. «Адай» және «Бастау» шығармаларындағы домбыраның сиқыры мыңдаған көрерменнің жүрегін ерекше әсерге бөледі.

Димаш фестиваль иелерінің қонақжайлылығы үшін алғыс айтып, қазақ пен қырғыз халықтары арасындағы ұлы достық болған, бар және бұдан кейін де бола беретініне мол сенім білдірді.

GALLERY