2026 жылғы 16 қаңтарда Шанхай орындаушылық өнер орталығында 2026 Tmall NEWTY Festival Offline Events фестивалінің салтанатты рәсімі өтті.

Қазақстанның халық әртісі Димаш Құдайберген фестиваль шымылдығын ашып, жаңа аранжировкада орындалған авторлық «Fire» композициясымен және шамамен он жыл бұрын Қытайдағы Singer жобасында зор табыспен жеткізген «All By Myself» әнімен көрермендерді жаңа шығармашылық кеңістікке жетеледі.

Брендтік жаңалықтар арасындағы «Оскар» деп танылатын фестивальдің марапаттау рәсімі заманауи уақыттың сценарийін қайта пайымдай отырып, ең озық әрі жарқын идеяларды бір арнаға тоғыстырды.

Маркетинг, сән, дизайн, мәдениет және өзге де салалардағы инновациялар үшін берілген марапаттар белгілі өнерпаздардың музыкалық қойылымдарымен үйлесіп, мерекелік сәттің салтанатын айшықтай түсті.

Салтанатты кешті жабу мәртебесі де қазақстандық өнерпазға бұйырды. Димаш «Олимпико» кантатасын орындап, биік белестерге бағытталған әсерлі үндеу жолдады.

Tmall – танымал брендтер мен ресми дилерлердің түпнұсқа өнімдерін сатуға маманданған Қытайдағы ірі онлайн-маркетплейс.

Singer жобасына қатысу және аяқталған кезеңінде де Димаш Құдайберген компания ұйымдастырған бірқатар іс-шараларға бірнеше мәрте қатысты. 2017 жылғы 10 қарашада ол Шанхай қаласында өткен Global Shopping Festival шарасында өнер көрсетіп, «Мысықтар» мюзиклінен «Memory» әнін орындаған болатын.