29–30 қазан күндері Анкара қаласында Түркі мемлекеттері ұйымының (ТМҰ) XIII саммиті өтті. Алқалы жиынның басты тақырыбы мен ұраны – «Түркі жүзжылдығы: тілде, пікірде және істе бірлік».

Саммитке Түркі мемлекеттері ұйымына мүше бес елдің – Қырғызстан, Қазақстан, Өзбекстан, Әзербайжан және Түркияның басшылары қатысты. Сонымен қатар жиынға бақылаушы мемлекеттер – Мажарстан, Түрікменстан және Солтүстік Кипр Түрік Республикасының өкілдері шақырылған.

29 қазанда Президенттік конгресс және мәдениет орталығында Түркі мемлекеттері ұйымына мүше елдер басшыларының құрметіне арналған арнайы концерт өтті.

Концерттің қорытынды бөлімінде Қазақстан мен Қырғызстанның халық әртісі Димаш Құдайберген өнер көрсетті.

Өнерпаздың орындауында оның шығармашылық қолтаңбасына айналған француз тіліндегі «SOS d’un terrien en détresse» туындысы, сондай-ақ заманауи өңдеудегі қазақтың халық әні «Самалтау» мен «Адай» күйі шырқалды.

Димаш Құдайберген туған елінің дәстүрлі музыкасын мәртебелі қауымға аспаптық өнер шеберлері – домбырашылар Темірлан Олжабай мен Ернат Наурыздың, қобызшы Олжас Құрманбек пен сыбызғышы Санжай Әлмішевтің сүйемелдеуімен таныстырды.