Ұлыбританияның «Wanderlust» журналында Қазақстанның астанасына арналған «Астананың заманауи рухын таныңыз – Қазақстанның креативті астанасы» атты мақала жарияланды. Мәдениет пен шығармашылыққа арналған бөлім халық әртісі Димаш Құдайбергеннің өнерінен басталады.

«Астана – қиял мен инновация заманауи жарық пен ашық кеңістікте жүзеге асатын қала. Бұл – батыл инженерлік шешімдер мен футуристік биік ғимараттар Ұлы даланың тарихын жадында сақтаған тірі мәдениетпен қатар өмір сүріп жатқан мекен. Көкжиектегі әрбір силуэт ертеңге көз тіксе, әрбір көше осы қаланың бастау алған көшпелі мәдениетінің ізіне толы», – деп басталады «Wanderlust» журналындағы Қазақстан астанасы жөніндегі тартымды әңгіме.

1993 жылдан бері жарық көріп келе жатқан бұл басылым саяхат, мәдениет және табиғат тақырыптарын қамтитын Ұлыбританиядағы туристік журналдар арасында кең таралымға ие журнал. «Wanderlust» мақалалары практикалық кеңестерді, мекендерге жасалған шолулар мен авторлық сапар тарихын қамтиды.

Астанаға арналған мақалада басылым қаланың заманауи архитектурасы мен дизайн ерекшеліктерін ашып көрсетіп, жолаушыларға арналған қызықты бағыттарды ұсынады. Сондай-ақ астананың ең ерекше атмосфералы орындары туралы баяндайды.

Шығармашылыққа арналған бөлімде авторлар Димаш Құдайберген өнерінің елге көптеген туристерді тартудағы магнетикалық ықпалына төмендегіше тоқталады:

«Егер Астананың сәулеті қаланың мәдениетін көрнекі түрде танытатын құбылыс болса, оның материалдық емес мұрасы да соншалықты жарқын көрініс табады. Мұны Қазақстанның туризм жөніндегі елшісі, Димаш Құдайберген феномені айқын дәлелдейді. Оның концерттері әлемнің түкпір-түкпірінен жанкүйерлерді жинап, оларды Қазақстанға сапар шегуге ерекше ынталандырып жүр. Әншінің вокалдық диапазоны алты октавадан асады (шамамен C2–D8), тіпті ысқырық регистріне дейін жетеді. Гастрольдік сапарлары мен арнайы жобаларының арқасында оның өнері саяхатшылар үшін нағыз мәдени «магнитке» айналып отыр».

Толық мақаланы төмендегі сілтеме арқылы оқуға болады:
https://www.wanderlustmagazine.com/inspiration/modern-spirit-of-astana/