Димаш Құдайбергеннің Польшадағы жанкүйерлері DiVoices хорымен бірлесіп мәдени-қайырымдылық шара өткізді. 2026 жылғы 4 қаңтарда аталған хор мүшелері Польшаның Ольштын қаласындағы «Laurentius» қамқорлық үйінің тұрғындарына арналған қайырымдылық концертін ұйымдастырды.

DiVoices — үш жыл бұрын құрылған, Димаш Құдайбергеннің поляк фан-клубы мүшелерінен тұратын төрт дауысты хор. Бұл ұжым қазақстандық өнерпаздың шығармашылығын насихаттау және оның туындыларын хор аранжировкасында орындау мақсатында құрылған.

Концерт аясында төрт дауысты өңдеуде поляктың бірнеше рождестволық әндері орындалды. Сонымен қатар Димаш Құдайбергеннің репертуарынан «Makhabbat», «Ұмытылмас күн» және «Daididau» атты үш түрлі қазақ әні төрт дауыста шырқалды. Концерттік бағдарлама соңында хор поляк эстрадасында кеңінен танымал екі шығарманы орындады.

«Laurentius» қамқорлық үйінің мүшелеріне арналған бұл концерт қатысушылар мен тыңдармандардың жүрегіне терең әсер еткен іс-шараға айналды. Қарт кісілермен өткен кездесу жанды музыкалық қарым-қатынастың, адамдардың бір-біріне деген ыстық ықыласы мен өнерді бірлесе сезінудің маңызын айқындай түсті.

Музыка ұрпақтар арасындағы рухани диалогтың маңызды құралы ретінде танылды. Хор мүшелерінің айтуынша, концерт дәстүрлі сахналық өнердің шеңберінен шығып, өзара құрметке, ризашылық пен түсіністікке негізделген шынайы мәдени сұхбат.