Қазақстандық әнші Димаш Құдайбергеннің Мексикадағы фан-клубы төртінші жыл қатарынан Мексика мен Латын Америкасы елдеріндегі әлеуметтік тұрғыдан аз қамтылған отбасылардың балаларына қолдау көрсетуге бағытталған Juguetón («Ойыншықтар мерекесі») қайырымдылық акциясына қатысты.

Аталған бастама аясында Димаш Құдайбергеннің атынан көп мөлшерде ойыншықтар табысталды. «Сыйлық — қуаныш сыйлайды» ұранымен өтетін акция жыл сайын балаларға қуаныш сыйлауды мақсат еткен мыңдаған жанашыр жандарды біріктіреді.

Биыл фан-клуб мүшелері іс-шара барысында Қазақстан Республикасының Туын алып шығып, қонақтарды елдің ұлттық рәміздерінің бірімен таныстырды. Сонымен қатар Рождестволық ауылда ерекше мерекелік бағдарламалар өтіп, балалардың қуанышы, музыка мен би үйлесім тапты.

Dimash Qudaibergen Mexico фан-клубы Үш Патша күніне арналған мерекелік іс-шаралардың да бір бөлігіне айналды. Сондай-ақ клуб өкілдері Мексиканың ең танымал телеарналарының бірі — TV Azteca арнасына сұхбат беруге шақырылды.