2026 жаңа жыл қарсаңында Қарағанды қаласындағы Димаш Құдайбергеннің фан-клубы ерекше қажеттіліктері бар, үй жағдайында әлеуметтік қызметтер алатын балаларды қолдауға бағытталған «Жақсылық жасап жарысайықшы» атты қайырымдылық акциясын ұйымдастырды.

Акция аясында қамқорлықтағы балалар мен олардың заңды өкілдеріне сыйлықтар табысталып, келе жатқан Жаңа жылмен құттықтады. Іс-шара қатысушыларға мерекелік көңіл күй сыйлап, ерекше назар мен шынайы қамқорлықтың үлгісін көрсетті.

Аталған қайырымдылық шара фан-клубтың жыл сайын жүзеге асыратын игі дәстүріне айналған. Белсенділер 2022 жылдың желтоқсан айынан бері әлеуметтік маңызы бар бастамаларды жүйелі түрде іске асырып келеді.

Мерекелік іс-шара Қарағанды қаласы Әлихан Бөкейхан ауданының «Үй жағдайында әлеуметтік көмек көрсету бөлімі» ҚММ-нің қатысуымен өтті.

Ұйымдастырушылардың айтуынша, оларды ізгі істерге жетелейтін басты үлгі — Димаш Құдайбергеннің шығармашылығы мен азаматтық ұстанымы. Өнер иесі өз шығармашылығы мен жеке көзқарасы арқылы мейірімділікке, адамгершілікке және айналамыздағы адамдарға қамқор болуға үндейді.