Чилидегі қазақстандық әнші Димаш Құдайбергеннің жанкүйерлер клубы Луис Кальво Маккенна атындағы балалар онкологиялық ауруханасындағы ем қабылдап жатқан балаларға тағы да қолдау көрсетті. 23 желтоқсан күні фан-клуб мүшелері жедел жәрдем бөлімшесіне барып, алдағы мерекелерге орай балалар мен олардың ата-аналарына сыйлықтар табыстады.

Фан-клубтың әкімшісі Вильма Рамос: “Біз балалар мен ата-аналардың күту уақытын барынша жайлы әрі жағымды еткіміз келді”,- деп атап өтті. Сыйлықтар қатарында тәттілермен бірге ауруханада жатқан балаларға қажетті жөргектер де табысталды.

Сонымен қатар фан-клуб мүшелері жылына екі рет пластикалық бөтелке қақпақтарын жинап, оларды «Damas de Café» еріктілер ұйымы арқылы өткізеді. Жиналған қаражат әлеуметтік тұрғыдан аз қамтылған отбасылардан шыққан балалардың химиотерапия шығындарын өтеуге бағытталады.

«Димаш бізді әрдайым жақсылыққа ұмтылуға және өзгелерге қол ұшын созуға шабыттандырады», — деп атап өтті Вильма Рамос.