Шынында да, бұл кеш тарихи сәтке айналды. Бірақ сол концерттің ішінде ерекше орын алған бір туынды бар – ол «Бір аспанның тарихы»…

«Мыңдаған жүрек. Бір дем. Бұл түн тарихта да, менің жүрегімде де мәңгі қалады.

Осы арманды менімен бөліскен менің командама, музыканттарға, көрермендер мен осы сапарға сенім артқан әрбір жанға алғысым шексіз.

Музыка бізді біріктіріп, соның нәтижесінде Қазақстаннан Америкаға дейін, жүректен жүрекке, жаннан жанға жетеледі», – деп Димаш Нью-Йорктегі концерттен кейін өзінің Instagram парақшасында өз ойымен бөлісті.

Сол кештің финалында Димаш өзінің авторлық туындысын – үш жылдан астам уақыт бойы жазылған, төрт ірі конфессияның музыкалық және тарихи элементтері тоғысқан шығармасын орындап берді.

«Бір аспан тарихының» негізгі идеясы: «Біз нәсілге, ұлтқа, дінге бөлінеміз, бірақ бәріміз – бір ғаламшардың перзентіміз, бәріміз – бір аспан астында өмір сүреміз. Өмір – ең жоғары құндылық», – деген ойды береді.

Бұл композиция «Stranger» турының алғашқы күнінен, яғни 2022 жылдың 23 қыркүйегіндегі Алматыда өткен шоудан бастап Димаштың тұрақты репертуарына енген. Содан бері әрбір концерт сайын орындалып, көрермендердің жүрегіне жол тауып келеді.

Madison Square Garden залындағы көрермендер Реквиемді көздерінде жас алып, қолдарын жүректеріне қойған күйі орындарынан тік тұрып қарсы алды. Бес, он, он бес минут бойы ешкім орнына отырмады.

Қошемет толастамай залдың да, көрерменнің де әншіге деген терең ризашылық пен бейбіт өмірге деген ортақ тілеуін білдіргендей еді.

Димаш ерекше толқып, көп сөзге бармастан, бар сезімін «Бізге бейбітшілік керек…» деген бір ғана сөйлеммен жеткізді.

Кейін Димаш жанкүйерлеріне арнаған үндеуінде Нью-Йорктегі осы концерт туралы «Армандардың тарихқа айналған сәті» атты деректі фильм дайындап жатқанын хабарлады.