Ақпан айында Қазақстанның Жапониядағы Елшілігінде Төтенше және Өкілетті Елші Ерлан Баударбек-Қожатаевтың қолдауымен «Uly Dala Dami» атты қазақ асханасына арналған шеберлік сабағы ұйымдастырылды. Іс-шараға барлығы 22 адам, яғни Димаш Құдайбергеннің жапондық фан-клубының өкілдері қатысты.

Фан-клуб жетекшісі мен кеңесшісінің шақыруымен шараға Жапонияның белгілі мәдениет қайраткерлері – актриса Эри Ватанабэ, актер Хинато Тэдзука және кинорежиссер Синдзю Сано қатысты.

Қонақтарға Қазақстанның ұлттық тағамдары – манты мен бауырсақтан дәм татқызды. Шеберлік сабағына қатысушылар ұйымдастырушылардың жетекшілігімен арнайы алжапқыштарын тағып, тағам әзірлеуге белсене атсалысты.

Іс-шара алаңында қазақ халқының ұлттық музыкалық аспаптары, дәстүрлі әшекей бұйымдары мен ұлттық киімдері қойылған көрме де ұйымдастырылды. Тағам дайындалғаннан кейін қонақтар ұлттық киімдерді киіп көріп, жылы атмосфераға толы естелік суреттерге түсіп алды.