Нью-Йорктегі Димаштың жеке концертіне арнайы қонақ ретінде аранжировщик әрі композитор Дмитро Гордон қатысты.

Ол Флавьен Компаньон және Доминик Бурс сынды музыканттармен бірге Уолтер Афанасьефтің жетекшілігімен «Love’s Not Over Yet» композициясын әзірлеген. Бұл туынды Димаштың репертуарына алғаш рет дәл осы Нью-Йорктегі концертте қосылды.

Сонымен қатар, Дмитро Димаштың бірнеше авторлық әндерінің аранжировкасымен айналысып, кейбірінің мәтінін жазуға да атсалысқан. Солардың ішінде «Smoke», «Fire», «When I’ve Got You» секілді тыңдарманға жол тартқан шығармалар бар.

5 қазан күні өткен «Stranger» шоуында Дмитро Димашқа сүйемел ретінде рояльде ойнап, «When I’ve Got You» әнін бірге орындады.

«Madison Square Garden сахнасында өнер көрсету – кез келген музыканттың арманы. Ал мен үшін бұл арманның орындалуы ерекше бақыт.

Бірақ дәл осы сахнада Димашпен бірге өнер көрсету – армандағанымнан да асып түсті. Маған бұл бір ғажайып түс сияқты көрінді. Кейде оянып кетіп, мұның бәрі түсім болып қалмаса екен деп қорқамын. Бақытымызға орай, сол сәттерді еске салатын фото мен видео бар (күледі).

Жалпы, сахнадағы энергия керемет болды – ол Димаштан да, музыканттардан да, тыңдармандардан да бірдей сезілді. Мен, әрине, бұл күнді мәңгі есте сақтаймын! – деді Дмитро DimashNews редакциясына берген сұхбатында.