Нұр-Сұлтанда балалар мен жасөспірімдерге арналған алғашқы қазақ тілді «ÖZINŞE» онлайн-кинотеатрының тұсаукесері өтті. Стримингтік платформада әр түрлі жастағы балалар қазақ тілінде фильмдер, мультфильмдер, сериалдар мен ситкомдарды көре алады.

Балаларға арналған онлайн-кинотеатрды іске қосу туралы идеяны балалар контентін жасаушылар Мақпал Жұмабай мен Сандуғаш Баймаханқызы 2020 жылы ұсынған болатын. Олар балаларға сүйікті фильмдері мен мультфильмдерін ана тілінде көруге ыңғайлы платформа құрғысы келді.

Жобаның бренд-амбассадоры Дәулет Мұқаев таныстыру барысында барлық ата-аналарды балаларына қосымша орнатуға шақырды. Оның айтуынша, «Өзінше» -бұл тек онлайн-кинотеатр ғана емес, сонымен қатар балаларға сапалы білім беру мазмұнын ұсынатын сенімді платформа.

«Әр бала өзінше бірегей, сондықтан да мобильді қосымша атауының өзі ерекше мәнге ие. «ÖZINŞE» онлайн-кинотеатры еркін өмір сүргісі келетін және өз қалауы бойынша әрекет еткісі келетін креативті балаларға арналған», — деп атап өтті Мақпал Жұмабай.

Қазақстан Республикасының Ақпарат және қоғамдық даму министрі Асқар Омаров конференция барысында жобаға үлкен қолдау білдіріп, министрлік платформаны жаңа контентпен толтыруға көмектесетінін хабарлады.

«ÖZINŞE» қосымшасы барлығына AppStore және GooglePlay интернет-дүкендерінде ақысыз қол жетімді. Бүгінгі таңда платформада балаларға арналған 3400 минуттық ойын-сауық және танымдық мазмұн бар.

Онлайн кинотеатрды жасаушылар болашақта қосымшада тек отандық ғана емес, сонымен қатар шетелдік мазмұн да болатынын атап өтті.