24 қарашадан бастап Мысырдың Гиза қаласында алғаш рет «The Pyramids Echo» фестивалі өтуде. Бағдарлама мыңжылдықтар даналығы мен сұлулығын сақтап тұрған ерекше тарихи мекенде әлемге әйгілі оркестрлер мен қазіргі дәуірдің музыкалық бағыттарын айқындап отырған вокалистердің бірегей өнер көрсетулерін қамтиды.

Фестивальдің Pyramids Panorama алаңындағы жабылу концерті Қазақстан мен Қырғызстанның Халық әртісі Димаш Құдайбергенге тапсырылды.

Фестивальдің ашылуы 24 қарашада өтіп, оған әлемге танымал Lang Lang қытай пианисті Royal Philharmonic Concert Orchestra-мен бірге ғаламат бастау берді.

Екінші күні Мысыр елінің танымал музыканттары — Ammar El Sherei мен Hesham Nazih туған елінің мәдениетін таныстырды.

Келесі күні әлемдегі ең танымал оркестрлердің бірі Royal Philharmonic Concert Orchestra көрермендерді Голливуд кинематографиясының әйгілі әуендері әлеміне жетеледі.

Фестивальдің төртінші түні Ливаннан келген Abeer Nehme және Сириядан келген Faia Younan-мен бірге шынай араб түні стилінде өтті.

Бесінші күн пирамидалардың етегінде үздік Мысырлық музыканттарды біріктірді: бас-баритон Ashraf Sewailam, меццо-сопрано Gala el Hadidi, тенор Ragaa Eldin, альтист Sindy Mohamed, сондай-ақ скрипкашылар Mariam Abouzahra және Amira Abouzahra өнер көрсетті.

Бүгін, 30 қараша күні, Димаш Құдайбергеннің халықаралық командасы Мысырға келіп, кешкі шоуға дайындалуда. Алғаш рет жеке концерт дәл осы аңыздармен көмкерілген мекенде — пирамидалар етегіндегі ашық аспан астында өтпек.

Мәдени мұра нысаны жанындағы бұл жеке концертте қазақстандық музыкант Димаш Құдайберген ежелгі Египет құдіретін әлемдік өнермен үйлестіретін сиқырлы шоуын ұсынады