Димаш Құдайбергеннің Уругвайдағы фан-клубы балаларға және әлеуметтік тұрғыдан осал жандарға көмек көрсетуге бағытталған бірқатар қайырымдылық іс-шаралар өткізді. Бұл бастамалар жергілікті ұйымдар мен мұқтаж азаматтарды қолдау мақсатында жүзеге асырылды.

Канелонес департаментіне қарасты Лас-Пьедрас қаласының Лайонс клубында «Сау омыртқа» атты терапиялық йога бойынша қайырымдылық мастер-класс ұйымдастырылды. Іс-шараға қатысушылар саны көп болды. Жиналған барлық қаражатты мүгедектер арбаларын, жүріс тірегін (ходунок) және көмекке мұқтаж балалар мен жасөспірімдерге арналған көзілдіріктер сатып алу үшін Лайонс клубына табыстады.

Йога оқытушысы әрі фан-клубтың белсенді мүшесі Мириам сабақ өткізіп қана қоймай, уругвайлық Dears атынан қосымша қайырымдылық қаражатын ұсынды. Бұл іс-шара жиналған жалпы қолдаудың еселене түсуіне мүмкіндік берді.

Екінші бастама – Аэропарк ауданында өткен Балалар күнін атап өту шарасына қатысу болды. Dimash Uruguay FanClub мүшелері жергілікті әлеуметтік қолдау және тамақтандыру орталығына балаларға арналған сыйлықтар табыстады. Іс-шара жылы, қуанышты атмосферада өтіп, балалар мен ата-аналардың жүздеріне күлкі сыйлады.

Уругвайлық Dears осы игі бастамаларға үлес қосқан барша жанға алғыс білдіре отырып, олардың тәжірибесі басқа елдердегі Dears қауымдастықтарын жаңа қайырымдылық қадамдарға ынталандырады деп үміттенеді.