Димаштың халықаралық Dears for Peace жанкүйерлер қауымдастығы – жаһандық амбассадоры Димаш Құдайберген болып табылатын БҰҰ жүйесіндегі Халықаралық көші-қон ұйымының қызметін қолдауға бағытталған ауқымды қайырымдылық науқанын жүзеге асырды.

Аталған бастама әлемнің түрлі елдерінен жиналған 25-тен астам фан-клуб пен мыңдаған жанкүйерлерді біріктірді. Қатысушылардың бірлескен еңбегінің нәтижесінде 10 000 АҚШ долларынан астам қаражат жиналып, ол ХКҰ-ның гуманитарлық қызметін қолдауға бағытталды.

Жобаны іске асыру барысында жанкүйерлер қоғамдық кеңістіктер мен тақырыптық іс-шараларда түрлі ақпараттық және мәдени шаралар ұйымдастырып, Димаштың шығармашылығы, оның қоғамдық қызметі мен гуманитарлық құндылықтарын таныстырды. Осы бастамалардың арқасында көп адам алғаш рет өнерпаздың шығармашылығымен танысып, қайырымдылық науқанына қосылды.

Тағы бір маңызды мәдени-ағартушылық жобалардың бірі Аргентинадағы Dimash Argentina фан-клубының бастамасымен FM Patagonia Andina 93.3 радиостанциясында іске қосылған – «Kazakh Roots» («Қазақтың тамыры») атты бастамасы болды.

Бағдарлама әр жексенбі сайын эфирге шығып, тыңдармандарды Қазақстанның тарихы, дәстүрі, музыкасымен және мәдени мұрасымен таныстырады. «Қазақстанның мәні мен мазмұнын ашыңыз» ұранымен жүзеге асырылып отырған бұл жоба Аргентина мен Қазақстан арасындағы мәдени алмасуды дамытуға ықпал етіп, шетелдік аудиторияға елдің бай мәдениетін тереңірек тануға мүмкіндік береді.