25 қарашада оңтүстік Чилидің Чиллан қаласының 22 жастағы Пабло Ромеро Чилидегі ең ірі TVN телеарнасының “My Name Is” («Менің атым») шоуына қатысты . Оның бұл нөмірі қазақстандық әнші Димаш Құдайбергенге арналды.

Паблоның үлкен сахнаға шығу жолы бір жылға жетер-жетпес бұрын жергілікті байқаулардың бірінде Димаштың рөлінде өнер көрсеткен кезден бастау алды. Сол байқауда ол 2-орынға ие болды. Кейінірек, Лос-Анджелес қаласында өткен имитаторлар байқауына қатысып, өте тәжірибелі қатысушылармен бәсекелесіп, 3-ші орынды жеңіп алды. Дәл сол кезде Димаштың жанкүйерлері жас орындаушының талантын байқаған болатын.

Оның өнеріне қызығушылық танытқан жанкүйерлердің бірі Паблоны Чилидегі Димаштың жергілікті Dears командасымен таныстырған болатын. Олардың қолдауы мен Паблоның дауысы қазақстандық әншінің шығармашылығының әлемнің түкпір-түкпіріне, тіпті ең шалғай жерлерге де танымалдылығының артуына септігін тигізді.

Осымен тоқтап қалмай, ары қарай өнерін дамыту мен шыңдауды ойлаған Пабло әйгілі «Менің атым» шоуының кастингіне жазылған еді. 7 тамызда ол мыңға жуық қатысушы жиналған Сантьягодағы тыңдалымға келді. 10 сағаттық күтуден кейін ол кастингтен өтіп, 8 қарашада 80 финалисттің қатарынан көрінген болатын.

Оның 25 қарашадағы орындауы шығармашылығының шарықтау шегі болды. TVN сахнасында қатаң қазылар алқасы мен миллиондаған көрерменнің алдында Пабло Димаштың «S.O.S d’un terrien en détresse» әнін орындап, әншінің шығармашылығына қаншалықты құрметпен қарайтынын көрсетті.