Димаш Құдайберген және шоуға қатысушы әр елден келген қонақтар Маңғыстау облысынан Алматыға келді. Түсірілімдер мегаполистің танымал туристік орындарын және жалпы Алматы облысын қамтиды.

Қытайдан, Қырғызстаннан, Қазақстаннан, Малайзиядан, Италиядан және Сербиядан келген шоу қатысушылары Алматы облысының көрікті жерлеріне, соның ішінде су астындағы қарағайлы орманы бар Қайыңды көліне, UNWTO әлемдегі ең жақсы туристік ауылдардың бірі деп танылған Саты ауылына және Қапшағай су қоймасына саяхат жасайды.

Жобаға қатысушылар Алматыда Арбат көшесімен серуендеп, Көк базарды аралап, метроға сапар шегеді.

Димаштың халықаралық тележобасы мен Қытайдың Hunan Broadcasting System арнасының бірлескен жобасы Қазақстанның бай туристік және музыкалық әлеуетін кең халықаралық аудиторияға ұсына отырып, өз сапарын Астана қаласында аяқтайды.