Димаш Құдайбергеннің «AQERKE» композициясы халықаралық Channel R Radio радиостанциясы ұйымдастырған #UltimateSummerCountdown жазғы қорытынды рейтингінің үздік үштігіне енді.

Channel R – заманауи танымал музыка мен жаңа музыкалық релиздерге маманданған тәулік бойы жұмыс істейтін онлайн-радиостанция. Радиостанция жарнамасыз хабар таратып, өзінің мобильді қосымшасы және iHeartRadio, Audacy, TuneIn, Apple Music сияқты кеңінен қолданылатын стримингтік платформалар арқылы дүниежүзі тыңдармандарына қолжетімді.

#UltimateSummerCountdown жазғы рейтингі тыңдармандардың жаһандық дауыс беруі нәтижесінде қалыптастырылды. Қорытынды тізімге 20 композиция енгізіліп, олардың нақты реттік орны Channel R радиосының әлемнің әр түкпіріндегі тыңдармандарының дауыс беру нәтижелері негізінде анықталды. Дауыс беру 3 қыркүйекте аяқталып, қорытынды рейтинг 5 қыркүйекте жарияланды.

Дауыс беру қорытындысы бойынша Димаш Құдайбергеннің «AQERKE» әні рейтингте үшінші орынға ие болды. Осылайша, композиция Channel R халықаралық аудиториясының бағалауы бойынша жазғы маусымдағы ең танымал үш әннің қатарына енді.