Шілде айының алғашқы жексенбісінде Қазақстанда Ұлттық домбыра күніне орай Бельгияның бірден екі радиостанциясы өз эфирлерін осы мерекеге және Димаш Құдайбергеннің шығармашылығына арнады.

AFM Radio (Льеж) радиостанциясының эфирінде бельгиялық Dears фан-клубының өкілі Венди Мразек Қазақстан халқын Ұлттық домбыра күнімен құттықтап, тыңдармандарға домбыра қазақ халқының ұлттық аспабы әрі рухани мұрасының ажырамас бөлігі екені туралы айтып берді. Сондай-ақ ол қазақ тілінде: «Домбыра күні құтты болсын!» деген жүрекжарды құттықтауын жеткізді.

Бағдарлама барысында радио жүргізушісі Венди Буктің Қазақстан Елшілігінің жанындағы қазақ тілі курстарында білім алып жүргенін және Бельгияда Қазақстанның мәдениетін белсенді түрде насихаттап келе жатқанын атап өтті. Эфирде сондай-ақ Димаш Құдайбергеннің Еуропадағы концерттік туры туралы ақпарат берілді. Жүргізушілер бұған дейін бельгиялық фан-клубтың Қазақстанның Гент қаласындағы Елшілігінің табыстауымен Димаштың арнайы Алғыс хатқа ие болғанын да тілге тиек етті.

Сонымен қатар AFM Radio радиостанциясының өкілдері Димаш Құдайбергеннің шығармашылығына арналған арнайы бағдарламаны алдағы уақытта жыл сайын тұрақты түрде эфирге шығарып отыратындарын мәлімдеді.

Сұхбаттан кейін эфирде Димаштың орындауындағы «Adai» және «Daididau» әндері шырқалды.

Мерекелік бастама MCSRadio Aywaille радиостанциясы тарапынан да қолдау тапты. Димаш Құдайбергеннің әндері күн сайын берілетін бұл радиостанцияның жүргізушілері де Қазақстан халқын Ұлттық домбыра күнімен құттықтап, қазақ тілінде «Домбыра күні құтты болсын!» деген ізгі тілектерін жеткізді.